ബജറ്റ് പ്രഖ്യാപനങ്ങൾക്ക് ഇനി പ്രവർത്തനവേഗം:‘റീഇമാജിനിങ് കേരളം’ റൗണ്ട് ടേബിളിന് ഇന്ന് തുടക്കം

2026–27 ബജറ്റിലെ വികസന പദ്ധതികൾ വേഗത്തിൽ നടപ്പാക്കാൻ ‘റീഇമാജിനിങ് കേരളം’ റൗണ്ട് ടേബിൾ കോൺഫറൻസ് സെപ്റ്റംബർ 16 മുതൽ 18 വരെ തിരുവനന്തപുരത്ത് നടക്കും

തിരുവനന്തപുരം: സംസ്ഥാന ബജറ്റിൽ പ്രഖ്യാപിച്ച വികസന പദ്ധതികൾ വേഗത്തിൽ നടപ്പാക്കുന്നതിനുള്ള ‘റീഇമാജിനിങ് കേരളം’ റൗണ്ട് ടേബിൾ കോൺഫറൻസിന് ഇന്ന് തിരുവനന്തപുരത്ത് തുടക്കം. സെപ്റ്റംബർ 16 മുതൽ 18 വരെ നടക്കുന്ന മൂന്ന് ദിവസത്തെ സമ്മേളനത്തിൽ സംസ്ഥാനത്തിന്റെ ഭാവി വികസനവുമായി ബന്ധപ്പെട്ട വിവിധ പദ്ധതികൾ വിശദമായി ചർച്ച ചെയ്യും.

40ലേറെ വകുപ്പുകളുമായി ബന്ധപ്പെട്ട 73 പദ്ധതികളാണ് പ്രധാനമായും പരിഗണിക്കുന്നത്. വ്യവസായം, നിക്ഷേപം, ഐ.ടി., ആർട്ടിഫിഷ്യൽ ഇന്റലിജൻസ്, ആരോഗ്യം, ടൂറിസം, ഗതാഗതം, ഊർജം, വിദ്യാഭ്യാസം തുടങ്ങിയ മേഖലകളിലെ പദ്ധതികൾ ചർച്ചകളിൽ ഉൾപ്പെടും.

മന്ത്രിമാർ, ഉന്നത ഉദ്യോഗസ്ഥർ, വിദഗ്ധർ, വ്യവസായ പ്രതിനിധികൾ, നിക്ഷേപകർ തുടങ്ങിയവർ വിവിധ സെഷനുകളിൽ പങ്കെടുക്കും. പദ്ധതികളുടെ നിലവിലെ സ്ഥിതി, സാമ്പത്തിക സാധ്യത, ആവശ്യമായ വിഭവങ്ങൾ, വിവിധ വകുപ്പുകൾ തമ്മിലുള്ള ഏകോപനം എന്നിവ പരിശോധിക്കും.

ബജറ്റിലെ പ്രഖ്യാപനങ്ങൾ ചർച്ചകളിൽ ഒതുങ്ങാതെ വ്യക്തമായ സമയക്രമവും ഉത്തരവാദിത്തവും നിശ്ചയിച്ച് നടപ്പാക്കാനുള്ള പ്രവർത്തനരേഖ തയ്യാറാക്കുകയാണ് സമ്മേളനത്തിന്റെ പ്രധാന ലക്ഷ്യം. ആവശ്യമായ പദ്ധതികൾക്ക് സാധ്യതാ പഠനം, DPR (Detailed Project Report) തയ്യാറാക്കൽ തുടങ്ങിയ തുടർനടപടികൾക്കും സമ്മേളനം വഴിയൊരുക്കും.

‘Ideas, Projects, Actions’ എന്ന ആശയത്തെ അടിസ്ഥാനമാക്കിയാണ് ‘റീഇമാജിനിങ് കേരളം’ സംഘടിപ്പിക്കുന്നത്. മൂന്ന് ദിവസത്തെ ചർച്ചകൾക്ക് ശേഷം പദ്ധതികളുടെ തുടർനടപടികൾ ഏകോപിപ്പിക്കുന്നതിനും നിരീക്ഷിക്കുന്നതിനുമുള്ള സംവിധാനവും രൂപപ്പെടുത്തും.