അഴിമുഖം ചന്ദ്രബോസിൻ്റെ അശീതി ആഘോഷ സമ്മേളനത്തിൽ എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശനെതിരെ രൂക്ഷ വിമർശനവുമായി ശ്രീനാരായണ സഹോദര ധർമ്മവേദി ചെയർമാൻ ഗോകുലം ഗോപാലൻ
”ഞാൻ അദ്ദേഹത്തിന് പേര് ഇടുകയാണ് – ഭസ്മാസുരൻ. എല്ലാ വരങ്ങളും വാങ്ങി, കൂടെയുള്ളവരെ ദ്രോഹിച്ച്, എല്ലാ അധികാരങ്ങളും പിടിച്ചെടുത്ത അവസ്ഥയാണ്. അതാണ് വെള്ളാപ്പള്ളിക്ക് നമ്മൾ കൊടുക്കുന്ന പേര്” എന്നായിരുന്നു പരാമർശം.
തിരുവനന്തപുരം: എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശനെതിരെ രൂക്ഷ വിമർശനവുമായി ശ്രീനാരായണ സഹോദര ധർമവേദി ചെയർമാൻ ഗോകുലം ഗോപാലൻ. എസ്എൻഡിപി യോഗത്തിന്റെ ഭരണത്തിൽ വെള്ളാപ്പള്ളി നടേശന്റെ ഏകാധിപത്യ സ്വാധീനമാണ് നിലനിൽക്കുന്നതെന്ന് ഗോകുലം ഗോപാലൻ ആരോപിച്ചു.
എസ്എൻഡിപി യോഗത്തെ ‘ഭസ്മാസുരൻ ഭരിക്കുന്ന’ അവസ്ഥയാണെന്നായിരുന്നു ഗോകുലം ഗോപാലന്റെ വിമർശനം. പണവും അധികാര സ്വാധീനവും ഉപയോഗിച്ചാണ് വെള്ളാപ്പള്ളി സംഘടനയുടെ തലപ്പത്ത് തുടരുന്നതെന്നും അദ്ദേഹം ആരോപിച്ചു.
സാധാരണ അംഗങ്ങളുടെ താൽപര്യങ്ങൾ സംരക്ഷിക്കുന്നതിനുപകരം വ്യക്തിപരവും കുടുംബപരവുമായ താൽപര്യങ്ങൾക്കായി സംഘടനയെ ഉപയോഗപ്പെടുത്തുകയാണെന്നും ഗോകുലം ഗോപാലൻ കുറ്റപ്പെടുത്തി. സംഘടനയ്ക്കുള്ളിലെ എതിർപ്പുകളെയും വിമർശനങ്ങളെയും അംഗീകരിക്കാത്ത ഭരണരീതിയാണ് വെള്ളാപ്പള്ളി പിന്തുടരുന്നതെന്നും അദ്ദേഹം ആരോപിച്ചു.
എസ്എൻഡിപി യോഗം ഏതെങ്കിലും വ്യക്തിയുടെയോ കുടുംബത്തിന്റെയോ സ്വകാര്യ സ്വത്തല്ലെന്നും ഗോകുലം ഗോപാലൻ വ്യക്തമാക്കി. ശ്രീനാരായണ ഗുരുവിന്റെ സാമൂഹിക സമത്വം, സഹോദര്യം, വിദ്യാഭ്യാസ പുരോഗതി തുടങ്ങിയ ആശയങ്ങൾ ഉയർത്തിപ്പിടിച്ചാണ് സംഘടന മുന്നോട്ടുപോകേണ്ടതെന്നും അദ്ദേഹം പറഞ്ഞു.
വെള്ളാപ്പള്ളിക്കെതിരെ ഗോകുലം ഗോപാലൻ നേരത്തെയും സമാനമായ ആരോപണങ്ങൾ ഉന്നയിച്ചിട്ടുണ്ട്. 2026 മാർച്ചിൽ വെള്ളാപ്പള്ളിക്കെതിരായ ഹൈക്കോടതി വിധിയെ സ്വാഗതം ചെയ്ത ഗോകുലം ഗോപാലൻ, അത് ‘സത്യത്തിന്റെ വിജയം’ ആണെന്ന് പ്രതികരിച്ചിരുന്നു. വെള്ളാപ്പള്ളി പണവും അധികാരവും സ്വാർഥ താൽപര്യങ്ങൾക്ക് ഉപയോഗിച്ചുവെന്നും അന്ന് അദ്ദേഹം ആരോപിച്ചിരുന്നു.
അതേസമയം, വെള്ളാപ്പള്ളി നടേശൻ പക്ഷം ഗോകുലം ഗോപാലന്റെ ആരോപണങ്ങളെ അംഗീകരിച്ചിട്ടില്ല. ഇരുപക്ഷവും തമ്മിലുള്ള തർക്കം വർഷങ്ങളായി തുടരുകയാണ്.