പത്മശ്രീ അഡ്വ സി.കെ മേനോനെ അദ്ദേഹത്തിന്റെ ഏഴാം ചരമവാര്‍ഷിക ദിനത്തില്‍ സുഹൃത്തും , ബിര്‍ള പബ്ലിക്‌ സ്കൂള്‍ ഡെയറക്ടറും ജംമ്പോ ഇലക്ട്രോണിക്സ് സി ഇ ഓയുമായ ശ്രീ സി വി റപ്പായ് അനുസ്മരിക്കുന്നു
“ദിവംഗതനായ പത്മശ്രീ അഡ്വ സി.കെ. മേനോനുമായുള്ള സൗഹൃദത്തിന് വർഷങ്ങളുടെ പഴക്കമുണ്ടായിരുന്നു. എന്നാൽ, അടുത്തിടപഴകി ഒരുമിച്ച് പ്രവർത്തിക്കാൻ അവസരം ലഭിച്ചത് 2007 മുതലാണെന്ന്” സി.വി. റപ്പായ് അനുസ്മരിക്കുന്നു.
അദ്ദേഹം വൈസ് ചെയർമാനായും താൻ ഡയറക്ടറായും നോര്‍ക്ക റൂട്ട്സില്‍ പ്രവർത്തിച്ച കാലം ജീവിതത്തിലെ വിലപ്പെട്ട ഓർമകളിലൊന്നാണെന്ന് സി വി റപ്പായ് പറയുന്നു. ഇൻകെൽ ഡയറക്ടർമാരായും ഇരുവരും ഒരുമിച്ച് പ്രവർത്തിച്ചു. ഔദ്യോഗിക വേദികളിലെ സഹപ്രവർത്തകരെന്ന ബന്ധത്തിനപ്പുറം നിരവധി തവണ ഒരുമിച്ച് യാത്ര ചെയ്യാനും പല സുപ്രധാന വിഷയങ്ങളിലും ആശയവിനിമയം നടത്താനും അവസരം ലഭിച്ചു.
ജീവിതത്തിലെ പല പ്രധാന ഘട്ടങ്ങളിലും തീരുമാനങ്ങൾ എടുക്കുമ്പോൾ സി.കെ. മേനോന്റെ ഉപദേശവും നിർദേശങ്ങളും തേടാറുണ്ടായിരുന്നുവെന്ന് റപ്പായ് പറയുന്നു. കാര്യങ്ങളെ ആഴത്തിൽ മനസ്സിലാക്കി വിശാലമായ കാഴ്ചപ്പാടോടെ അഭിപ്രായങ്ങൾ പറയുന്ന അദ്ദേഹത്തിന്റെ സമീപനം പലപ്പോഴും വഴികാട്ടിയായിട്ടുണ്ട്.
അനുഭവസമ്പത്തിന്റെയും മനുഷ്യബന്ധങ്ങളുടെയും കരുത്തിൽ നിന്നുള്ള അദ്ദേഹത്തിന്റെ വാക്കുകൾക്ക് തനിക്ക് വലിയ വിലയുണ്ടായിരുന്നുവെന്നും റപ്പായ് ഓർക്കുന്നു.
ലോകത്തിന്റെ വിവിധ ഭാഗങ്ങളിലായി സമൂഹത്തിന്റെ എല്ലാ ശ്രേണികളിലുംപ്പെട്ട ആളുകളുമായി സി.കെ. മേനോന് ഉണ്ടായിരുന്ന ബന്ധം വളരെ വലുതായിരുന്നു. ജാതി, മതം, കക്ഷി രാഷ്ട്രീയം തുടങ്ങിയ അതിർവരമ്പുകൾക്കപ്പുറമായിരുന്നു ആ ബന്ധങ്ങൾ. സഹായം ആവശ്യപ്പെട്ട് അദ്ദേഹത്തെ സമീപിക്കുന്നവർക്ക് തന്റെ ബന്ധങ്ങളും പരിചയങ്ങളും ആവശ്യമെങ്കിൽ പ്രയോജനപ്പെടുത്താൻ അദ്ദേഹം എപ്പോഴും സന്നദ്ധനായിരുന്നു. മറ്റുള്ളവരുടെ ആവശ്യങ്ങൾക്കായി തന്റെ സ്വാധീനവും ബന്ധങ്ങളും ഉപയോഗപ്പെടുത്തുന്നതിൽ അദ്ദേഹം ഒരിക്കലും മടിച്ചിരുന്നില്ല.
ദാനധർമത്തിൽ സന്തോഷം കണ്ടെത്തിയ വ്യക്തിയായിരുന്നു സി.കെ. മേനോൻ.എണ്ണിയാലൊടുങ്ങാത്ത ജീവകാരുണ്യ പ്രവർത്തനങ്ങളാണ് അദ്ദേഹം തന്റെ ജീവിതത്തിൽ നടത്തിയത്. അവയിൽ പലതും പരസ്യപ്പെടുത്താതെയും പ്രചാരണം നടത്താതെയുമായിരുന്നു. നന്മ ചെയ്യുക എന്നതായിരുന്നു അദ്ദേഹത്തിന് പ്രധാനം; അത് മറ്റുള്ളവർ അറിയണമെന്ന ആഗ്രഹം അദ്ദേഹത്തിനുണ്ടായിരുന്നില്ല.
തൃശൂർ മുനിസിപ്പൽ മേഖലയിലെ ഒരു പിന്നോക്ക പ്രദേശത്തെ വികസനത്തിനായിട്ടുള്ള ഒരു പദ്ധതിയുടെ ഉത്തരവാദിത്വം അദ്ദേഹം ഏറ്റെടുത്തത് ഇതിന് ഉദാഹരണമായി റപ്പായ് ഓർക്കുന്നു. പദ്ധതി പൂർത്തിയാക്കാൻ അന്ന് ഏകദേശം ഒന്നര കോടിയിലധികം രൂപയാണ് അദ്ദേഹം ചെലവഴിച്ചത്. എന്നാൽ, ഇതിന്റെ പേരിൽ അദ്ദേഹം യാതൊരു കൊട്ടിഘോഷവും നടത്തിയില്ല. തൃശൂർ ജില്ലക്കാരനായ തന്നോട് മുനിസിപ്പല്‍ കോര്‍പ്പറേഷനിലെ അന്നത്തെ സ്റ്റാന്റിംഗ് കമ്മിറ്റി ചെയര്‍മാന്‍ പറഞ്ഞപ്പോഴാണ് ഇക്കാര്യം താൻ അറിയുന്നതെന്നും റപ്പായ് പറയുന്നു.അദ്ദേഹത്തിന്റെ സഹായഹസ്തം എത്തിയ പല പദ്ധതികളില്‍ ഒന്നുമാത്രമാണിത്.
സി.കെ. മേനോന്റെ നന്മകളുടെ ആഴം വ്യക്തമാക്കുന്ന ഇത്തരം നിരവധി സംഭവങ്ങൾ അദ്ദേഹത്തിന്റെ ജീവിതത്തിലുണ്ടായിരുന്നു. പരസ്യമായും രഹസ്യമായും അദ്ദേഹം നടത്തിയ ജീവകാരുണ്യ പ്രവർത്തനങ്ങൾക്ക് കണക്കില്ല. സമൂഹത്തോടും കഷ്ടപ്പെടുന്നവരോടും സഹപ്രവർത്തകരോടും എന്നും കാരുണ്യത്തിന്റെ കരങ്ങൾ നീട്ടി ചേർത്തുപിടിച്ച വ്യക്തിത്വമായിരുന്നു അദ്ദേഹത്തിന്റേത്.
അതുകൊണ്ടുതന്നെ സി.കെ. മേനോന്റെ വിയോഗം ഒരു സുഹൃത്തിന്റെ നഷ്ടം മാത്രമല്ലെന്ന് സി.വി. റപ്പായ് മലയാളധ്വനിയോട് പറഞ്ഞു.
സ്നേഹവും കരുതലും അനുഭവസമ്പത്തും പകർന്നുനൽകിയ ഒരു വലിയ മനുഷ്യനെയാണ് നഷ്ടപ്പെട്ടത്. വ്യക്തിപരമായ പല തീരുമാനങ്ങളിലും അഭിപ്രായം തേടാനും ജീവിതത്തിലെ പല ഘട്ടങ്ങളിലും വഴികാട്ടിയായി കാണാനും കഴിഞ്ഞിരുന്ന ഒരാളുടെ വിയോഗം തീർത്തും നികത്താനാവാത്ത നഷ്ടമാണ്.
“ഒരു സുഹൃത്ത് എന്നതിലുപരി എനിക്ക് നഷ്ടപ്പെട്ടത് ഒരു നല്ല മാർഗദർശിയെയാണ്.”
സി.കെ. മേനോന്റെ ജീവിതത്തെ ഓർക്കുമ്പോൾ, അദ്ദേഹം ചെയ്ത നന്മകളും മനുഷ്യരോട് പുലർത്തിയ കരുതലും തന്നെയാണ് ഏറ്റവും വലിയ സ്മാരകമായി അവശേഷിക്കുന്നത്. പ്രചാരണമില്ലാതെ സഹായിച്ചവരുടെയും വേദനിക്കുന്നവരിലേക്ക് കരുണയുടെ കൈ നീട്ടിയവരുടെയും ഓർമകൾ കാലം കഴിയുന്തോറും കൂടുതൽ തിളക്കമുള്ളതാകുന്നു.
അത്തരമൊരു ദീപ്തമായ സ്മരണയ്ക്ക് മുന്നിൽ ഹൃദയം നിറഞ്ഞ സ്നേഹാഞ്ജലികൾ അർപ്പിക്കുന്നു സി വി റപ്പായ്.