തിരുവനന്തപുരം: നിയമസഭാ തിരഞ്ഞെടുപ്പിലെ കനത്ത തിരിച്ചടിക്ക് പിന്നാലെ പാർട്ടിക്കുള്ളിലെ തിരുത്തൽ നടപടികൾ ചർച്ചയാകുന്നതിനിടെ സിപിഎം സംസ്ഥാന കമ്മിറ്റിയുടെ രണ്ടുദിവസത്തെ യോഗത്തിന് ഇന്ന് തുടക്കമാകും. പിണറായി വിജയന്റെ കണ്ണൂർ പ്രസംഗവുമായി ബന്ധപ്പെട്ട വിവാദവും പാർട്ടിയിലെ സംഘടനാ വിഷയങ്ങളും യോഗത്തിൽ ചർച്ചയാകുമെന്നാണ് സൂചന.
തിരഞ്ഞെടുപ്പ് പരാജയത്തിന്റെ പശ്ചാത്തലത്തിൽ പാർട്ടി പ്രവർത്തകരുടെയും അനുഭാവികളുടെയും നിലപാടുകൾ ഉൾപ്പെടെ പരിശോധിച്ചാണ് സിപിഎം മുന്നോട്ടുപോകുന്നത്. സ്ഥാനാർഥി നിർണയത്തിലുണ്ടായ പാളിച്ചകൾ ഉൾപ്പെടെയുള്ള വിഷയങ്ങൾ കണ്ണൂർ ജില്ലാ കമ്മിറ്റി ചൂണ്ടിക്കാട്ടിയിരുന്നു. ഇതിന്റെ വിലയിരുത്തലുകളും സംസ്ഥാന കമ്മിറ്റി തയ്യാറാക്കിയ റിപ്പോർട്ടും തുടർചർച്ചകൾക്ക് അടിസ്ഥാനമാകും.
പിണറായി വിജയൻ കണ്ണൂരിൽ നടത്തിയ പ്രസംഗത്തിലെ പരാമർശങ്ങളാണ് നിലവിലെ പ്രധാന രാഷ്ട്രീയ ചർച്ചകളിലൊന്ന്. തിരഞ്ഞെടുപ്പിൽ പാർട്ടി സ്ഥാനാർഥികൾക്കെതിരെ പാർട്ടി പ്രവർത്തകരിൽ ചിലർ വോട്ട് ചെയ്തുവെന്ന വിമർശനമാണ് പ്രസംഗത്തിൽ ഉയർന്നത്. ഇതിനെതിരെ പാർട്ടിക്കുള്ളിലും പുറത്തും വ്യത്യസ്ത പ്രതികരണങ്ങളുണ്ടായി.
അതേസമയം, പിണറായിയുടെ നിലപാടിനെ പരസ്യമായി പിന്തുണച്ച് സിപിഎം ജനറൽ സെക്രട്ടറി എം.എ. ബേബി രംഗത്തെത്തിയത് വിവാദത്തിന് കൂടുതൽ രാഷ്ട്രീയ പ്രാധാന്യം നൽകിയിട്ടുണ്ട്. സ്ഥാനാർഥിയെക്കുറിച്ച് പരാതികളുണ്ടെങ്കിലും പാർട്ടി തീരുമാനിച്ച സ്ഥാനാർഥിക്കുതന്നെ പാർട്ടി അംഗങ്ങൾ വോട്ട് ചെയ്യണമെന്നും അഭിപ്രായവ്യത്യാസങ്ങൾ പാർട്ടിക്കുള്ളിൽ ഉന്നയിക്കണമെന്നും ബേബി വ്യക്തമാക്കി.
പാർട്ടി ഇപ്പോൾ ‘ആന്തരിക ചികിത്സ’യിലൂടെ കടന്നുപോകുകയാണെന്നും തെറ്റുതിരുത്തൽ പ്രക്രിയയുടെ ഭാഗമായി ചിലപ്പോൾ കടുത്ത നടപടികൾ ആവശ്യമായി വരുമെന്നും ബേബി പറഞ്ഞു. പോളിറ്റ് ബ്യൂറോ യോഗത്തിൽ പാർലമെന്ററി മോഹം, ജനങ്ങളുടെ പ്രതീക്ഷകൾക്കനുസരിച്ച് പ്രവർത്തിക്കുന്നതിലെ വീഴ്ച, കൂട്ടായ പ്രവർത്തനത്തിന്റെ അഭാവം തുടങ്ങിയ വിഷയങ്ങളിൽ ആത്മവിമർശനം നടന്നതായും അദ്ദേഹം വ്യക്തമാക്കി.
നേതൃമാറ്റവുമായി ബന്ധപ്പെട്ട ചർച്ചകളെ ‘മാധ്യമങ്ങളുടെ അജണ്ട’ യെന്നാണ് ബേബി വിശേഷിപ്പിച്ചത്. അതേസമയം, തിരഞ്ഞെടുപ്പ് തോൽവിയുടെ കാരണങ്ങൾ സംബന്ധിച്ച പാർട്ടി രേഖകളിൽ ആത്മവിമർശനം ഉൾപ്പെടുത്തിയിട്ടുണ്ടെന്നും അദ്ദേഹം വ്യക്തമാക്കിയിട്ടുണ്ട്.
മുന്നണി ബന്ധങ്ങളും ചർച്ചയിൽ
സിപിഎം-സിപിഐ ബന്ധത്തിൽ അടുത്തിടെ ഉയർന്ന തർക്കങ്ങളും യോഗത്തിൽ ശ്രദ്ധ നേടാൻ സാധ്യതയുണ്ട്. പ്രതിപക്ഷ ഉപനേതൃ പദവിയുമായി ബന്ധപ്പെട്ട തർക്കം ഇടതുമുന്നണിക്കുള്ളിൽ ചർച്ച ചെയ്ത് പരിഹരിക്കുമെന്നാണ് എം.എ. ബേബി നേരത്തെ വ്യക്തമാക്കിയത്.
നവംബർ 13 മുതൽ 15 വരെ കോഴിക്കോട് നടക്കുന്ന വിപുലീകൃത സംസ്ഥാന കമ്മിറ്റി യോഗത്തിന് മുന്നോടിയായുള്ള നിർണായക ചർച്ചകൾക്കും ഇന്നത്തെ യോഗം വഴിയൊരുക്കും. തിരഞ്ഞെടുപ്പ് പരാജയത്തിന് ശേഷം സംഘടനയെ ശക്തിപ്പെടുത്തുന്നതിനുള്ള നിർദേശങ്ങൾക്കാണ് ഇനി പ്രധാന പരിഗണന നൽകുകയെന്നാണ് പാർട്ടി നേതൃത്വത്തിന്റെ നിലപാട്